البارحة شفت الوطن " قصيدة للشاعر العراقي عباس جيجان

البارحة شفت الوطن بالطيف أجاني البارجة
قتله هلا وميه هلا يأ بو الخيول الجامحة

مديت أيديه تسالمه شفت القلب قبل الجفوف يصافحه
شلونك قلت ياموطني وظنوني ظلت سارحه ..
وانقطع وسطي من الخجل من الخجل وعيوني ظلت شابحه ..
قال اطمأن ياولدي كفتنا هي الراجحه ..
قتله الْيِرد ياموطني لحضنك الدافي تسامحه !! ..
قال اْليِرد وإلْما يِردْ وحتى الْيِفكر بالوطن ذنوبه كلهن طايحه ..
بس الْيِخون اُمّيِتهْ ما يستحق نقرا على روحه الفاتحه ..
قتله يبه ياموطني عندي حجي بغزر الدموع المالحه ..
قال احجي قول شما قلت طبع الوطن مثل الابو واجب عليك تصارحه ..
قتله يبه ياموطني ليش انت من دول الدول صاحت عليك الصايحه ؟؟
وليش انت من دون الدول اطفالك الحلوين بالدم سابحه ؟؟
وليش انت من دون الدول بكل بيت عندك نايحه ؟؟
وليش انت من دون الدول ناسك إتْصبّح نازحه ؟؟
وليش انت من دون الدول جيرانه كلها تواقحه ؟؟
وليش انت من دون الدول يا ثور بالعالم قوي تركض عليه تناطحه ؟؟
متْقلي منهو الْخبلك يا بو العقول الراجحه !! ..
شفته ضحك .. شفته ابتسم لمن حِجى و جاوب اجابه واضحه ..

وقال المشكله مو بالوطن المشكله الحجاج هو الذابحه
يبقى الوطن هو الاصل والناس هي الرايحه ..
كفكف دموعك ياولد ادري بغريب الدار شوقه الجارحه ..
وادري بغريب الدار كل ما يِعتلي وكل ما صعد وشْما كسب خسران كل ما رابحه ..

حتى الطيور إلها وطن تهاجر لجل لمن يهزها الشوق ترجع طافحه ..
وحتى النخيل إلها وطن ما تنشتل إلا بأرضنا المالحه ..
بس إحنا نبقى لِشْ وقت يا موطني نحلم وطنا نصافحه ؟؟ ..
وخلاف الوطن تبقى البشر مثل البهايم دايحه ..
والبارحه شفت الوطن بالطيف أجاني البارحه

*****

للشاعر العراقي عباس جيجان

مع تحيات ليث عدنان

شكرااااا يا مبدع على القصدة