يوميه الشوارع تكعد اتانيك
اجدامك للشوارع صارن المرهم
خطواتك خرس ماتحس بيه الكاع
لكن لومشيت كلوب تتهدم
يالشعرك سيوف تدير بيه الريح
واذا بس تلتفت كل احنه نتعدم
شدّه من الورد مو صدر هذا البيك
ودنيناك ردنه من الورد نشتم
من تمشي حرس هارون يمشي وياك
وكدام الرشيد وعرشه تتقدم
واذا تكعد يجي يهفيلك المنصور
وكسرى وكل عبيده الموكبك ينظم
حمورابي عله ظهرك كاتب القانون
ونفتح زيج ظهرك حته نتعلم
سألوني عليك المنك يغارون
كلتلهم ورد هو الورد ينذم
شتتلثم بعد مايمر بيك تراب
ولك هيه الطبيعه اشلون تتلثم
اضمك بالشمس عن عين اليحسدون
لان هيه الشمس بس بالشمس تنظم
ورموشك ليالي تخيم عله الناس
ومابيهن نجم بيهن بشر ملتم
حبك موذنب مو اثم نؤثم ليش
بس المايحبك يخسر ويؤثم
لاتندم اصبعك منخلق للبوس
واذا عضيت اصبعك احنه نتندم
رسول الحب عليك الناس كلهه تكول
وبس حازم الكالو من اجيت اسلم
خريطة وطن كلبك شايل اشكد ناس
وشعر راسك علم فوك الشعب خيم
رمشك لو طبك تنجرح ناس هواي
ومثل كص المكص من كل كتر يلهم
لذا كل الجنائن علكوهن بيه
خاطر بين فتره وفتره تتقلم
يالنومك فراشه وكعدتك وردات
بس كلي الفراشه بنومه شتحلم
من يوم العرفتك ماشربت الماي
اشلون الماي اشربه وشفتك زمزم
يالخصرك قصيد وشاعرك مجنون
وكل ساعه قراهه بحجة المهتم
من شفت العسل وياك كلت اخوان
لان خذت الشبه بيناتكم عالدم
الشفايف مملكه ونحرسك ابوسات
وعله طول الشفايف بوس نتقسم
منقول
موضوع: مملكة الشفايف 
2009-01-29, 5:30 pm